Kурсот „Бизнис и човекови права“ е изготвен во рамки на Европската програма за образование за човекови права за правни професионалци, позната и како ХЕЛП. Се работи за програма на Советот на Европа изготвена со методологијата на ХЕЛП, финансирана од ЕУ. Материјалите за обука се изготвени од меѓународни експерти, со цел да се подобрат знаењата и вештините што директно може да се применуваат во секојдневната работа. Се работи за онлајн курс, којшто е интерактивен и се состои од повеќе модули.

Имено, курсот е изготвен имајќи предвид дека прашањето за почитувањето на човековите права и одговорноста за нивното евентуално прекршување од страна на компаниите е предмет на зголемена дебата и регулација, како на меѓународно, така и на национално ниво. Иако првенствено државите имаат обврска за заштита на човековите права, сè повеќе се става фокус и на обврската и одговорноста на компаниите на ова поле. Во оваа смисла, курсот ја обработува претходно споменатата проблематика, имајќи ги предвид релевантните правни рамки и практичните мерки што се на располагање.

Овој курс е отворен за сите заинтересирани адвокати. По завршување на курсот, адвокатите ќе добијат сертификати од Советот на Европа и Адвокатската комора на РСМ за успешно завршен курс.

Рокот за регистрација на заинтересираните адвокати за горенаведениот курс е до 27 април 2022 година и истите своето учество можат да го пријават на следната е-маил адреса: Оваа е-адреса е заштитена од спамботови. Треба да ви е овозможено JavaScript за да ја видите. . Учесниците ќе бидат прифаќани врз основа на принципот: прв пријавен – прв услужен.

Пријавените адвокати дополнително ќе бидат известени за процесот на регистрација на ХЕЛП платформата, како и за точниот датум на започнување на курсот. Предвидено е курсот да започне во првата половина на месец мај 2022 г.