Адвокатската комора на Република Северна Македонија денес свечено го одбележа 16 Јуни – Денот на македонската адвокатура, датум што го симболизира институционалното основање на организираната адвокатура во Македонија и нејзината повеќедецениска улога во заштитата на правата и слободите на граѓаните и јакнењето на владеењето на правото.

На свеченоста, која се одржа во просториите на Комората, присуствуваа претседателката на Република Северна Македонија, проф. д-р Гордана Сиљановска-Давкова, министерот за правда на Република Северна Македонија, Игор Филков, Претседателот на судскиот совет, Александар Камбовски,  претседателката на Апелациониот суд Скопје, Мери Дика Георгиевска,  Јавниот обвинител на Република Северна Македонија, Ненад Савески, народниот правобранител Фатон Сељами, деканот на Правниот факултет „Јустинијан Први“, проф. д-р Сашо Георгиевски, раководителот на Канцеларијата на Советот на Европа во Скопје, Олег Солдатов, претседателката на Комората на извршители, Весна Деловска, како и претседатели и претставници на судовите, претставници на државните институции, дипломатскиот кор, меѓународните организации, професионалните комори, медиумите, невладниот сектор и органите на Адвокатската комора.

Настанот го отвори извршната директорка на Адвокатската комора, Билјана Тошева, која им посака добредојде на присутните и го покани претседателот на Адвокатската комора на Република Северна Македонија, адвокат Лазо Ѓорѓиевски, да им се обрати на присутните.

Во своето обраќање, претседателот Ѓорѓиевски потсети дека токму на 16 јуни 1945 година, по предлог на тогашниот министер за правда д-р Павел Шатев, бил поставен институционалниот темел на македонската адвокатура.

„Денешното одбележување не е само свеченост. Ова е ден на почит кон една професија која веќе 81 година стои исправено во одбрана на правото, слободата и достоинството на човекот“, истакна Ѓорѓиевски.

Тој нагласи дека адвокатурата отсекогаш била многу повеќе од професија.

„Адвокатурата е глас на граѓанинот пред институциите. Гарант на правото на одбрана. Коректив кога системот ќе потфрли. И еден од најважните столбови на владеењето на правото. Адвокатот не е само застапник пред суд. Тој е чувар на правната сигурност и еден од последните бедеми меѓу моќта и граѓанинот“, порача претседателот на Комората.

Осврнувајќи се на современите предизвици со кои се соочува правниот систем, претседателот Ѓорѓиевски истакна дека иднината бара модерна, силна и обединета адвокатура, способна да одговори на новите општествени и технолошки промени.

„Силата на една држава не се мери само преку институциите што ги има, туку и преку тоа колку е независна, достоинствена и силна нејзината адвокатура“, нагласи тој.

Во своето обраќање тој ја претстави и визијата на новото раководство на Комората, истакнувајќи дека целта е изградба на адвокатура која ќе биде независна во своите ставови, достоинствена во постапувањето, современа во функционирањето и блиска до граѓаните.

„Нашата цел е адвокатура која ќе ги штити интересите на адвокатите, но истовремено ќе биде активен партнер во градењето на правна држава заснована на владеење на правото, а не на привилегии“, рече Ѓорѓиевски.

Тој истакна дека присуството на претставниците на највисоките државни институции, судската и обвинителската власт, академската заедница, дипломатскиот кор, меѓународните организации, невладиниот сектор и медиумите претставува силна потврда за значењето што адвокатурата го има во демократското општество и во функционирањето на правната држава.

Во изјава за медиумите по завршувањето на свеченоста, претседателката на Република Северна Македонија, проф. д-р Гордана Сиљановска-Давкова, ја истакна важноста на адвокатурата како еден од клучните столбови на владеењето на правото и нејзината незаменлива улога во правниот систем.

„Прво, не случајно адвокатурата е уставна категорија. Второ, не случајно Павел Шатев, еден од првите акти што ги потпишал, се однесувале на адвокатурата. Тоа значи дека адвокатурата е незаменлива во одбраната на владеењето на правото.

Јас успеав денеска да посочам некои светски трендови што не постојат кај нас – во правосудната фела најчесто судиите се регрутираат од најдобрите адвокати. Кај нас, најдобрите судии си заминуваат од судот – погодете зошто – и одат во адвокатурата.

Понатаму, кога разговараме за Законот за јавно обвинителство, за судството и слично, забораваме дека еден правен базен на знаење и искуство се адвокатите. Зошто да не може и од редот на адвокатите да се регрутираат кадри, а не само преку Академијата за судии и јавни обвинители? Така би добиле на квалитет, заради нивното искуство и нивното знаење.

Особено сум среќна денеска што сум овде. Многу мои студенти се тука. Нема статус што може да го замени учителот во мене и јас сум горда што многу од нив се бунтовни, умни луѓе од знаење во судницата и тоа ме охрабрува дека има шанса не само за правото, туку и за правдата“, истакна претседателката Сиљановска-Давкова.

Со одбележувањето на Денот на македонската адвокатура, Адвокатската комора уште еднаш ја потврди својата определба за зачувување на независноста на адвокатурата, унапредување на професионалните стандарди и градење современа, силна и независна адвокатура како еден од темелите на демократското општество и владеењето на правото.




>> Интегрален говор на претседателот на Адвокатската комора, Лазо Ѓорѓиевски, по повод Денот на македонската адвокатура

>> Видео | Изјава за медиумите на претседателката на Република Северна Македонија, проф. д-р Гордана Сиљановска-Давкова по повод Денот на македонската адвокатура